ÍBV fluttist upp í þriðja sæti Olísdeildar karla í handknattleik í kvöld þegar liðið vann Hörð, 33:30, á viðureign liðanna í íþróttahúsinu á Torfnesi á Ísafirði. ÍBV var í kröppum dansi gegn botnliðinu en tókst að skora þrjú síðustu mörk leiksins og fara með stigin tvö með sér heim. Hörður var tveimur mörkum yfir eftir fyrri hálfleik, 18:16, en eins og stundum áður þá hélt liðið ekki út til leiksloka.
ÍBV hefur þar með 22 stig eftir 17 leiki og getur náð FH að stigum með sigri í heimsókn til ÍR-inga í Skógarsel á mánudagskvöldið.
Með tapinu syrti enn meira í álinn hjá leikmönnum Harðar sem sitja í neðsta sæti með tvö stig þegar þeir eiga fjóra leiki eftir. Úr þessu getur ekki einu sinni kraftaverk komið í veg fyrir að eins árs dvöl Ísafjarðarliðsins í Olísdeildinni ljúki í næsta mánuði.
Erlingur Richardsson þjálfari ÍBV fékk rautt spjald hjá Ramunas Mikalonis og Þorleifi Árna Björnssyni dómurum í leikslok.
Mörk Harðar: Leó Renaud-David 9, Jón Ómar Gíslason 5, Guntis Pilpuks 4, Victor Iturrino 3, Endijs Kusners 3, Guilherme Andrade 2, Óli Björn Vilhjálmsson 2, José Esteves Neto 2.
Varin skot: Rolands Lebedevs 17.
Mörk ÍBV: Kári Kristján Kristjánsson 10, Elmar Erlingsson 6, Gabríel Martinez Róbertsson 4, Sigtryggur Daði Rúnarsson 3, Arnór Viðarsson 2, Theodór Sigurbjörnsson 2, Róbert Sigurðarson 2, Nökkvi Snær Óðinsson 2, Dánjal Ragnarsson 1, Dagur Arnarsson 1.
Varin skot: Pavel Miskevich 9.
Staðan í Olísdeild karla og næstu leikir.
