- Auglýsing -
- Kristján Örn Kristjánsson, Donni, skoraði fjögur mörk í fimm skotum fyrir PAUC í jafntefli, 29:29, við US Ivry í frönsku 1. deildinni í handknattleik í gærkvöld. Leikurinn fór fram í París. Darri Aronsson er samningsbundinn Ivry en hann er frá keppni vegna meiðsla. Stigið getur verið Ivry mjög mikilvægt í botnbaráttunni. Liðið er nú komið upp í 13. sæti af 16 liðum með 13 stig. PAUC er í níunda sæti með 18 stig.
- Grétar Ari Guðjónsson og samherjar í Sélestat sitja áfram á botni frönsku 1. deildarinnar með sjö stig eftir 21. Þeir urðu af mikilvægu stigi í gærkvöld þegar viðeign þeirra við Créteil endaði með jafntefli, 32:32. Mario Lopez Alvarez jafnaði metin við Créteil úr vítakasti þegar leiktíminn var úti. Grétar Ari varði 7 skot, 21%, þann tíma sem hann stóð í marki Sélestat í leiknum.
- Ásgeir Snær Vignisson hafði hægt um sig í liði Helsingborg í gærkvöld í heimsókn til Önnereds HK í Gautaborg. Hann skoraði ekki mark í leiknum og virðist ekki hafa verið mikið í eldlínunni ef marka má tölfræði leiksins. Liðin skildu jöfn, 32:32, í næst síðustu umferð sænsku úrvalsdeildarinnar. Helsingborg er næst neðst fyrir lokaumferðina með 16 stig eins og Lugi og Redbergslid. Eitt lið fellur beint úr deildinni en þrjú fara í umspil við lið úr næst efstu deild
- Meðal liðanna úr næst efstu deild sem taka þátt í umspili um þrjú sæti í úrvalsdeildinni er Karlskrona sem Ólafur Andrés Guðmundsson samdi við á dögunum. Karlskrona hafnaði í öðru sæti næst efstu deildar en keppni lauk í gærkvöld. Amo HK fer beint upp eftir að hafa unnið deildina með 44 stigum í 26 leikjum. Karlskrona hafnaði í öðru sæti með 42 stig og Skanlea og Kungälvs hrepptu þriðja og fjórða sætið.
- Evrópumeistarar Barcelona í handknattleik karla ætla ekki að nýta sér krafta Króatans Luka Cindric á næstu leiktíð þótt hann hafi undirritaðann samning við félagið til ársins 2025. Dirario Sport segir að forsvarsmenn félagsins ætli að rifta samningnum í sumar og hafa þeir sagt Cindric að hann megi hefja leit að öðru liði fyrir næsta keppnistímabil.
- Pólskir fjölmiðlar sögðu frá því í gærkvöld samkvæmt heimildum að Marcin Lijewski verði í næstu viku ráðinn þjálfari pólska karlalandsliðsins í handknattleik. Lijewski er fyrrverandi landsliðsmaður Póllands og var m.a. í silfurliðinu á HM 2007. Hann þjálfaði síðast Górnik Zabrze í heimalandi sínu en hætti hjá félaginu á síðasta ári eftir þriggja ára starf.
- Brian Ankersen var í gær sagt upp starfi þjálfara hjá þýska 2. deildarliðinu Coburg sem Tumi Steinn Rúnarsson leikur með. Coburg hefur missti flugið í síðustu leikjum. Af því verður Ankersen að súpa seyðið. Íþróttastjóri Coburg, Jan Gorr, stýrir liðinu á morgun þegar Coburg sækir Elbflorenz heim til Dresden.
- Auglýsing -
