Andrea Jacobsen og samherjar í EH Aalborg misstu frumkvæðið í næstu efstu deild danska handknattleiksins í dag með tapi fyrir Bjerringbro, 31:28, í uppgjöri tveggja efstu liða deildarinnar. Þar með er Bjerringbro komið í kjörstöðu fyrir lokaumferðina eftir viku.
Eitt lið fer beint upp í úrvalsdeildina en næstu þrjú lið á eftir fara í umspil um sæti í efstu deild á næstu leiktíð.
Bjerringbro og EH Alaborg standa jöfn að stigum fyrir lokaumferðina, með 38 stig eftir 21 umferð. Bjerringbro stendur betur að vígi í innbyrðisleikjum um sem nemur einu marki eftir að liðin unnu hvort sína viðureignina.
Andrea skoraði tvö mörk í leiknum í dag. EH Aalborg var marki yfir í hálfleik, 14:13. Fyrir leikinn í dag hafði Álaborgarliðið unnið 19 leiki í röð.
Sigur hjá Bertu Rut
Berta Rut Harðarsdóttir skoraði tvö mörk þegar Holstebro vann Roskilde, 24:23, á útivelli í næsta efstu deild danska handknattleiksins. Holstebro er tveimur stigum á eftir Bejrringbro og EH Alaborg og mætir Bjerringbro í lokaumferðinni.
Andrea og félagar verða að leggja allt sitt traust á að Berta og félagar, sem eru í þriðja sæti deildarinnar, geti gert leikmönnum Bjerringbro skráveifu á heimavelli.
