„Það er bara fyrst og fremst mjög mikilvægt fyrir okkur að komast áfram í næstu umferð,“ sagði Elvar Örn Jónsson, landsliðsmaður í handknattleik og leikmaður danska liðsins Skjern við handbolta.is í dag eftir að Elvar Örn og félagar tryggðu sér sæti í annarri umferð Evrópudeildarinnar í handknattleik.
Skerjn vann þá lið Malmö , 26:25, í síðari viðureign liðanna í Baltiska-Arena í Malmö. Skjern vann einnig fyrri viðureignina á sínum heimavelli með einu marki, 27:26, um síðustu helgi. Eins og fyrri leikurinn þá var viðureignin í dag hnífjöfn og spennandi frá upphafi til enda. Aðeins var var eins marks munur á liðunum að loknum fyrri hálfleik, 14:13, Skjern í hag.
„Malmö-liðið reyndi að draga eins mikið úr hraða leiksins og hægt var. Sama gerðu þeir í fyrri leiknum en við stóðum þetta af okkur og er komnir áfram,“ sagði Elvar Örn ennfremur en hann skoraði eitt mark í leiknum. „Liðinu var róterað mjög mikið. Ég hefði alveg getað leikið meira því það er alltaf nóg til á tanknum,” sagði Elvar Örn Jónsson þegar handbolti.is náði í hann þar sem hann var að leggja af stað yfir til Danmerkur en framundan var nokkuð löng ferð yfir til Jótlands.
