- Auglýsing -
- Ásgeir Snær Vignisson skoraði eitt mark fyrir Helsingborg í gærkvöld þegar liðið vann Karlskrona, 28:25, á heimavelli Karlskrona í umspilskeppni um sæti í sænsku úrvalsdeildinni í handknattleik á næsta keppnistímabili. Liðin mætast á ný í Helsingborg á laugardaginn. Karlskrona hafnaði í öðru sæti næsta efstu deildar á dögunum. Ólafur Andrés Guðmundsson gengur til liðs við Karlskrona í sumar.
- Sænska handknattleikskonan Emma Olsson sem varð Íslandsmeistari með Fram á síðustu leiktíð hefur verið kölluð inn í sænska B-landsliðið sem mætir Hollendingum í tveimur vináttuleikjum í Almere í Hollandi á föstudag og laugardag. Olsson leikur nú með Borussia Dortmund og hefur gert það gott með liðinu á leiktíðinni.
- Valgerður Arnalds og Elín Ása Bjarnadóttir skrifuðu á dögunum undir nýjan tveggja ára samning við Fram. Þær hafa verið að feta sín fyrstu skref í meistaraflokki en báðar koma þær upp úr yngri flokkum félagsins.
- Í Noregi geta efstu lið úrvalsdeildanna valið sér mótherja í átta liða úrslitum úrslitakeppninnar eftir að deildarkeppninni er lokið. Nýkrýndir Noregsmeistarar Kolstad völdu að mæta Halden í átta liða úrslitum. Elverum, sem hafnaði í öðru sæti kaus að leika við Fjellhammer. Drammen og Nærbø ríða á vaðið í úrslitakeppninni 12.apríl. Daginn eftir eigast Elverum og Fjellhammer við og einnig Runar og Kristiansand. Kolstad tekur á móti Halden laugardaginn 15.apríl.
- Esbjerg vann dönsku bikarkeppnina í handknattleik kvenna á sunnudaginn. Liðið vann Danmerkurmeistara Odense Håndbold með 11 marka mun í úrslitaleik, 33:22. Norsku landsliðskonurnar Kristine Breistøl og Henny Reistad voru markahæstar hjá Esbjerg með samanlagt 14 mörk. Maren Aardahl var atkvæðamest hjá Odense-liðinu með átta mörk. Aðeins var eins marks munur að loknum fyrri hálfleik, 13:12, Esbjerg í vil.