Verður Vogurinn svartur og bleikur eða gulur og blár? Þessu verður svarað þriðjudaginn, í kvöld, þegar Vængir Júpíters og Fjölnir mætast í sannkölluðum baráttuslag um Grafarvoginn þar sem bæði lið eru með bækistöðvar. Leikurinn er liður í Íslandsmótinu í handknattleik, Grill 66-deildinni.
Þessi leikur verður einnig styrktarleikur en leikmaður sem tengist báðum liðum missti nýverið nákominn aðstandanda og hafa liðin þess vegna ákveðið að styrkja Píeta samtökin að þessu sinni.
Leikmenn, þjálfarar og stjórnarmenn munu leggja þessu lið með því að styrkja sem um nemur einum miða á leik eða 1.500 kr. Þá munu Vængir Júpíters leggja söfnuninni lið með 50.000 kr. framlagi.
„Við hvetjum alla til að styrkja þetta mikilvæga málefni og fylgjast með þessum spennandi handboltaleik í beinni! Hægt er að leggja inn frjálst framlag á reikning Fjölnis og Vængja: 0133-15-200680, kt. 631288-7589,“ segir í tilkynningu frá félögunum.
Leikurinn verður í beinni útsendingu á Vængir Júpíters TV á youtube.
