Fjölnir vann Vængi Júpíters í leiknum sem kallaður var “baráttan um Voginn” í Grill 66-deild karla í handknattleik í kvöld en liðin deila heimavelli í íþróttahúsinu í Dalhúsum í Grafarvogi, lokatölur 27:18. Fjölnir er þar með áfram í öðru sæti með 9 stig eftir sex leiki, er stigi á eftir ungmennaliði Vals en stigi á undan Víkingi sem leikur síðar í kvöld. Vængir Júpíters eru ennþá í basli og hafa aðeins náð tveimur stigum úr fyrstu tveimur leikjum sínum.
Leikmenn Vængjanna náðu að halda í við Fjölni í fyrri hálfleik og aðeins munaði tveimur mörkum að honum loknum, 12:10. Fjölnismenn tóku völdin í síðari hálfleik og unnu með níu marka mun, 27:18.
Leikurinn í kvöld var einnig styrktarleikur fyrir Píeta samtökin en leikmaður sem tengist báðum liðum missti nýverið nákominn aðstandanda og ákváðu bæði lið að styrkja Píeta samtökin að þessu sinni. Leikmenn, þjálfarar og stjórnarmenn lögðu lið með því að styrkja sem nemur um einum miða á leik eða 1.500 kr. Þá leggja leikmenn Vængja Júpíters söfnuninni lið með 50.000 kr. framlagi. Þótt leiknum sé lokið verður áfram hægt að leggja inn frjáls framlög á reikning Fjölnis og Vængja: 0133-15-200680, kt. 631288-7589.
Mörk Vængja Júpíters: Gísli Steinar Valmundsson 6, Jón Hjálmarsson 4, Jónas Bragi Hafsteinsson 2, Ragnar Áki Ragnarsson 2, Ari Pétursson 2. Brynjar Loftsson 1, Andri Hjartar Grétarsson 1.
Mörk Fjölnis: Brynjar Óli Kristjánsson 11, Elvar Otri Hjálmarsson 4, Jón Bald Freysson 4, Óðinn Freyr Heiðmarsson 3, Jónas Eyjólfur Jónasson 2, Goði Ingvar Sveinsson 2, Elvar Þór Ólafsson 1.
