Varnarmaðurinn galvaski Róbert Sigurðarson hefur samið við norska úrvalsdeildarliðið Drammen. Tekur samningur hans gildi í sumar og lýkur þar með sex ára samfelldri dvöl Róbert hjá ÍBV. Frá þessu greina bæði ÍBV og Drammen Håndballklubb í dag.
Róbert hefur verið einn besti varnarmaður Olísdeildar karla undanfarin ár og verið lykilmaður í varnarleik ÍBV. Hann gekk til liðs við ÍBV haustið 2017. Fyrst að láni frá liði Akureyrar handboltafélags. Tveimur árum síðan gerðist Róbert formlega félagsmaður ÍBV.
Róbert lék stórt hlutverk í þreföldu meistaraliði ÍBV vorið 2018 og varð einnig bikarmeistari með liðinu vorið 2020 og lék til úrslita um Íslandsmeistaratitilinn gegn Val fyrir ári síðan.
„Róbert hefur á sínum tíma í ÍBV leikið afar vel og stimplað sig rækilega inn í Eyjasamfélagið,“ segir í tilkynningu ÍBV.
Forsvarsmenn Drammenliðsins hafa leitað að öflugum varnarmanni til þess að koma í stað Óskars Ólafssonar sem hættir í vor og virðist það hafa orðið niðurstaðan að leita til annars Íslendings.