Lettneski landsliðsmarkvörðurinn Roland Lebedevs hefur ákveðið að róa á ný mið eftir að hafa staðið á milli stanganna hjá handknattleiksliði Harðar á Ísafirði undanfarin fjögur ár.
Lebedevs kom til Harðar þegar lið félagsins var að stíga sín fyrstu skref í 2. deild. Hann tók þátt í ævintýralegum uppgangi Ísafjarðarliðsins sem vann Grill 66-deild karla fyrir ári og lék í Olísdeildinni á nýliðinni leiktíð, fyrst liða frá Vestfjörðum.
Samkvæmt samantekt HBStatz var Lebedevs með 28,5% hlutfallsmarkvörslu í Olísdeildinni í vetur.
Eftir því sem handbolti.is kemst næst er óvíst hvað tekur við hjá Lebedevs á næstu leiktíð. Hann mun vera að skoða nokkra kosti, hvort heldur í heimalandinu eða utan þess.
Víst er að Lebedevs mun hafa nóg að gera síðar í þessum mánuði þegar lettneska landsliðið mætir franska landsliðinu og því pólska í síðustu tveimur umferðum undankeppni Evrópumótsins. Lettar reka lestina í áttunda riðli.
