Hildur Øder Einarsdóttir, markvörður hefur framlengt samningnum sínum við handknattleiksdeild ÍR. Hildur, sem kom til ÍR frá Stjörnunni, hefur reynst liðinu afar mikilvæg og verið einn allra besti markvörður Grill66-deildarinnar í vetur. Einnig hefur hún farið á kostum með ÍR-liðinu í umspili Olísdeildar, fyrst á móti Gróttu í undanúrslitum og nú síðast á móti Selfossi í úrslitunum.
„Hildur hefur verið besti markvörður deildarinnar í vetur og því mikil ánægja að hún skuli halda áfram með okkur. Hildur er skemmtilegur karakter og frábær liðsfélagi sem hefur reynst yngri leikmönnum okkar sérstaklega vel,” er haft eftir Sólveigu Láru Kjærnested í tilkynningu handknattleiksdeildar ÍR.
ÍR hefur unnið tvo fyrstu leikina við Selfoss í umspili Olísdeildar kvenna. Liðin mætast í þriðja sinn í Sethöllinni á Selfossi á miðvikudagskvöld.
