Saga Sif Gísladóttir markvörður hefur skrifað undir þriggja ára samning við Aftureldingu en hún hefur undanfarin ár leikið með Val. Hún hefur verið í fæðingaorlofi á tímabilinu og af þeim ástæðum ekki leikið marga leika með Valsliðinu. Hún kom þó við sögu með liðinu í úrslitahelgi Poweradebikarsins í byrjun mars.
Saga Sif sem er 28 ára markvörður hefur leikið með Val frá 2020 en áður var hún með Haukum, Fjölni og FH þar sem byrjaði í handbolta. Saga Sif hefur af og til verið í landsliðinu undanfarin ár.
„Handknattleiksdeild Aftureldingar fagnar mjög samningi við Sögu Sif og því að hún taki þátt í framtíðar uppbyggingu liðsins. Hún mun klárlega styrkja liðið með gæðum og reynslu, en einnig hvatningu og góðum karakter,“ segir í tilkynningu í kvöld.
Afturelding vann sér á ný sæti í Olísdeildinni í vor og er Saga Sif fyrsti leikmaðurinn sem bætist í hópinn fyrir átökin á næsta keppnistímabili.
