Hituðu upp fyrir úrslitaleik HM með sigri á toppliðinu

Aron Dagur Pálsson og samherjar í Alingsås hituðu upp fyrir úrslitaleikinn á HM í handknattleik í dag með því að sækja efsta lið sænsku úrvalsdeildarinnar heim í upphafsumferð deildarinnar á nýju ár. Leikmenn Alingsås fór ekki erindisleysu til Malmö því þeir unnu góðan sigur með fimm marka mun, 28:23, eftir að hafa verið marki undir í hálfleik, 11:10.

Alingsås er þar með komið upp í þriðja sæti deildarinnar með 27 stig eftir 21 leik, eru þremur stigum á eftir Malmö og Ystads IF.
„Þetta var flottur leikur hjá okkur í dag,“ sagði Aron Dagur í skilaboðum til handbolta.is sem hann sendi úr rútu Alingsås-liðsins sem var á hraðferð heim eftir sigurinn í Malmö í dag. Eins og gefur að skilja voru allir farþegarnir spenntir yfir úrslitaleiknum.

„Við byrjuðum frekar illa og lentum undir, 5:1, en náðum að jafna fyrir hálfleikinn. Svo keyrðum við bara yfir þá í seinni hálfleik,“ sagði Aron Dagur ennfremur.
Aron Dagur skoraði eitt mark í leiknum og átti tvær stoðsendingar.