Vonir leikmanna danska liðsins EH Aalborg um sæti í dönsku úrvalsdeildinni í handknattleik kvenna á næstu leiktíð liðu undir lok í dag með öðru tapi fyrir Ajax í umspili, 29:26, á heimavelli. Fyrir viku tapaði EH Aalborg fyrri viðureigninni.
Andrea Jacobsen átti stórleik fyrir EH Aalborg í dag. Hún skoraði níu mörk. Því miður dugði stórleikur hennar skammt.
Elín Jóna bætist í hópinn
Ajax heldur þar með sæti sínu í úrvalsdeildinni á næstu leiktíð. EH Aalborg, sem hafnaði í öðru sæti 1. deildar verður að gera aðra atlögu að úrvalsdeildarsætinu á næstu leiktíð. Þá verður Elín Jóna Þorsteinsdóttir landsliðsmarkvörður komin í hópinn auk þess sem Andrea mun halda sínu striki. Hún skrifaði fyrir nokkrum vikum undir nýjan samning við félagið.
EH Aalborg var einnig á barmi þess að fara upp í úrvalsdeildina fyrir tveimur árum. Þá lék Sandra Erlingsdóttir með liði félagsins við góðan orðstír.
