Díana Dögg Magnúsdóttir og samherjar hennar í BSV Sachsen Zwickau féllu niður í næst neðsta sæti þýsku 1. deildarinnar í handknattleik í dag eftir tap fyrir Neckarsulm, 28:25, á útivelli í næst síðustu umferð deildarinnar. Liðin höfðu þar með sætaskipti. Næst neðsta lið deildarinnar fer í umspil um sæti í deildinni gegn næst efsta liði 2. deildar.
Díana Dögg skoraði þrjú mörk í leiknum í dag og átti eina stoðsendingu. Neckarsulm var fimm mörkum yfir að loknum fyrri hálfleik, 14:9.
Í síðustu umferð deildarinnar, að viku liðinni, taka Díana Dögg og félagar á móti VfL Waiblingen, sem þegar er fallið í 2. deild. Neckarsulm sækir annað lið úr austrinu heim, SV Union Halle-Neustadt, sem vann Leverkusen í dag með fimm marka mun, 35:30, í Leverkusen. Þar með er ennþá von um að Díana og liðsfélagar í BSV Sachsen Zwickau sleppi við umspilið.
Sjá einnig:
Sautján marka sigur hjá Söndru og samherjum
