Dagskráin: Ráðast úrslit Íslandsmótsins í kvöld?

Þriðji úrslitaleikur ÍBV og Hauka um Íslandsmeistaratitilinn í handknattleik karla fer fram í íþróttamiðstöðinni í Vestmannaeyjum í kvöld. Flautað verður til leiks klukkan 19.15. Mikið verður um dýrðir í kringum leikinn enda ekki útilokað að úrslit ráðist í kapphlaupinu um Íslandsbikarinn.

ÍBV stendur vel að vígi eftir tvo sigurleiki, 33:27 og 29:26. Haukar hafa ekki unnið leik til þessa og þurfa á sigri að halda til þess að koma í veg fyrir sigurhátíð á fjölum íþróttamiðstöðvarinnar að leik loknum.

Olísdeild karla, úrslit, leikur þrjú:
Vestmannaeyjar: ÍBV – Haukar (2:0), kl. 19.15 – sýndur á Stöð2sport.