Hafdís Shizuka Iura hefur skrifað undir nýjan samning við Víking og mun því spila áfram með liðinu á næsta tímabili, eftir því sem fram kemur í tilkynningu frá Vikingi.
Hafdís kom til Víkings fyrir ári síðan en hafði áður m.a. leikið með Fram, Fylki og HK. Hún varð strax mjög mikilvægur hluti liðsins og var hún skipuð fyrirliði liðsins ásamt Örnu Þyrí Ólafsdóttur. Hafdís lét mikið til sín taka í sóknarleik Víkings og fór svo að hún var sá leikmaður liðsins sem skapaði flest færi. Hafdís var valin besti sóknarmaðurinn á lokahófi Víkings.
„Hafdís kemur með mikil gæði inn í leik liðsins og er stór karakter inn í hópinn þannig að halda henni er virkilega sterkt fyrir félagið,“ sagði Jón Brynjar Björnsson þjálfari Víkings í áðurnefndri tilkynningu.
