- Auglýsing -
- Daninn Claus Mogensen hefur verið ráðinn þjálfari kvennalandsliðs Færeyinga í handknattleik. Mogensen er fimmtugur og þrautreyndur þjálfari sem víða hefur komið við á ferlinum, í heimalandi sínu, einnig í Noregi og í Þýskalandi. M.a. þjálfaði Mogensen København Håndbold um sex ára skeið og varð liðið óvænt meistari undir hans stjórn 2018.
- Auk þjálfunar færeyska kvennalandsliðsins verður Mogensen við stjórnvölin hjá kvennaliði Horsens í dönsku úrvalsdeildinni á næstu leiktíð. Færeyska handknattleikssambandið væntir þess að Mogensen verði hvalreki fyrir landsliðið. Hann tekur þegar til starfa á þriggja ára starfssamningi.
- Nicolej Krickau þjálfari GOG var kjörinn þjálfari ársins í karlahandknattleik í Danmörku. Jesper Bangshøi þjálfari Bjerringbro FH var kjörinn þjálfari ársins úr hópi þjálfara kvennaliða. Þetta er í fyrsta skipti í sögunni sem þjálfari liðs úr næst efstu deild hreppir hnossið. Bjerringbro FH vann næst efstu deild og tekur sæti í úrvalsdeildinni á næsta keppnistímabili.
- Torbjørn Bergerud markvörður Kolstad Håndball og norska landsliðsins var kjörinn leikmaður ársins í norsku úrvalsdeildinni í karlaflokki. Anna Vyakhireva leikmaður Vipers þótti skara fram úr öðrum leikmönnum úrvalsdeildar kvenna. Vyakhireva var einnig valin mikilvægasti leikmaður úrslitahelgar Meistaradeildar Evrópu um síðustu helgi þegar Vipers varð Evrópumeistari þriðja árið í röð.
- Esbjerg varð í fyrrakvöld danskur meistari í handknattleik kvenna eftir að hafa unnið Odense Håndbold, 34:21, í síðari úrslitaleik liðanna sem fram fór í Esbjerg. Þar með var bundinn endi á tveggja ára sigurgöngu Odense Håndbold í dönsku úrvalsdeildinni. Esbjerg varð síðasta meistari 2021.
- Ikast hreppti bronsverðlaun eftir að NFH (Nykøbing Falster), 27:24, einnig í annarri viðureign liðanna.
- Norski landsliðsmaðurinn Harald Reinkind hefur ákveðið að vera áfram hjá þýska handknattleiksliðinu THW Kiel. Hann skrifaði á dögunum undir samning til næstu fjögurra ára, Reinkind gekk til liðs við THW Kiel fyrir fimm árum
- Auglýsing -
