Stjarnan færðist upp að hlið Fram í þriðja til fjórða sæti Olísdeildar kvenna í handknattleik með öruggum sigri á FH, 29:22, í Kaplakrikia í kvöld. Stjarnan hefur tíu stig eins og Fram en hefur leikið einum leik fleira en HK og Fram ljúka áttundu umferð deildarinnar síðdegis á morgun. FH rekur áfram lestina án stiga.
Fanney Þóra Þórsdóttir, FH, og Stjörnukonan Eva Björk Davíðsdóttir fóru á kostum í Kaplakrika í kvöld. Þær skoruðu 10 mörk hvor. FH-ingar urðu fyrir áfalli rúmlega 10 mínútum fyrir leikslok þegar Britney Cots var sýnt rauða spjaldið fyrir leikbrot hjá dómurum leiksins, Jónasi Elíassyni og Ómari Erni Jónssyni. Cots braut þá á Helenu Rut Örvarsdóttur.
Cots hafði þá skorað fimm af mörkum FH-liðsins. Skýrsla vegna agabrots er sögð fylgja leikskýrslu í athugasemd á leikskýrslu.
Stjarnan var þremur mörkum yfir að loknum fyrri hálfleik, 15:12.
Mörk FH: Fanney Þóra Þórsdóttir 10/5, Britney Cots 5, Emma Havin Sardardóttir 4, Ragnheiður Tómasdóttir 3.
Varin skot: Írena Björk Ómarsdóttir 11 skot, 27,5%.
Mörk Stjörnunnar: Eva Björk Davíðsdóttir 10/6, Katla Magnúsdóttir 5, Helena Rut Örvarsdóttir 4, Anna Karen Hansdóttir 2, Sólveig Lára Kjærnested 2, Hanna Guðrún Stefánsdóttir 2, Ásthildur Bertha Bjarkadóttir 2, Elena Elísabet Birgisdóttir 1, Thelma Sif Sófusdóttir 1.
Varin skot: Tinna Húnbjörg Einarsdóttir 7 skot, 33,3% – Hildur Öder Einarsdóttir 6 skot, 42,9%.
