- Auglýsing -
- Arnór Atlason verðandi aðstoðarþjálfari íslenska karlalandsliðsins er þjálfari U21 árs landsliðs Danmerkur sem tekur þátt í heimsmeistaramótinu í handknattleik. Mótið verður það síðasta sem Arnór tekur þátt í með yngri landsliðum Danmerkur sem hann hefur þjálfað undanfarin þrjú ár. Hann hefur fylgt þessum hóp eftir frá því á EM19 ára landsliða sumarið 2021.
- Danska landsliðið, með Arnór við stjórnvölin, tók það norska í karphúsið í fyrstu umferð í gær, 33:22, eftir að hafa verið fjórum mörkum yfir í hálfleik, 16:12.
- Bertus Servaas forseti pólska meistaraliðsins Barlinek Industria Kielce hefur ákveðið að draga sig í hlé eftir 25 ár í forsetastólnum. Servaas tilkynnti ákvörðun sína opinberlega í gær í móttöku sem haldin var fyrir liðið eftir að það kom heim frá Þýskalandi frá þátttöku í úrslitahelgi Meistaradeildar Evrópu í handknattleik. Kielce hlaut silfurverðlaun annað árið í röð.
- Síðustu mánuðir hafa reynt mjög á Servaas. Félagið steig krappan dans eftir að það missti sinn aðala styrktaraðila um áramótin. Illa gekk að ná samningum við annan í hans stað og leit út um tíma að Kielce yrði að draga mjög saman seglin fjárhagslega. Um síðir tókst að ná samningum við Barlinek.
- Á aldarfjórðungi hefur Servaas byggt félagið upp og gert það að einu allra besta handknattleiksliði Evrópu fyrir utan að það hefur nær einokað pólska meistaratitilinn og bikarkeppnina nær því alla þessa öld.
- Stuðningsmenn þýska handknattleiksliðsins Stuttgart geta tekið gleði sína á ný. Hjálmur lukkudýrs liðsins, Johnny Blue, er kominn í leitirnar. Hjálmurinn hafði verið týndur og tröllum nær því gefinn í hálfan þriðja mánuð. Gátu forráðamenn liðsins, og margir stuðningsmenn vart á sér heilum tekið meðan hjálmurinn kom ekki í leitirnar. Hjálmurinn, sem metinn er á jafnvirði um einnar milljónar króna, fannst við leit í geymslu liðsins í Porsche Arena í Stuttgart. Svo virðist sem sjaldan sé litið í geymsluna. Óttast var að fingralangir hefðu tekið hjálminn en sem betur fer reyndist svo ekki vera.
- Danska úrvalsdeildarliðið Kolding hefur leigt þýska handknattleiksmanninn Robert Timmermeister frá bikarmeisturum Rhein-Neckar Löwen í Þýskalandi. Leigusamningurinn er til tveggja ára. Timmermeister er efnileg hægri handar skytta.
- Auglýsing -
