„Við fengum möguleika á að ná tökum á leiknum í byrjun síðari hálfleiks. Þá var vörnin leikin eins og við viljum og þá fundu Haukar engar lausnir. Hinsvegar þá brást okkur bogalistin í nokkrum færum í sókninni. Svekkelsið smitaðst yfir í vörnina og við fórum aftur að hlaupa úr vörninni sem við ætluðum að spila. Það sýnir styrk Haukaliðsins að leysa eina sterkustu vörn landsins,“ sagði Sebastian Alexandersson, þjálfari Fram, eftir sex marka tap fyrir Haukum, 34:28, í Olísdeildinni í kvöld.
„Við náðum að skora 28 mörk þrátt fyrir að Haukar séu með eina bestu vörnina í deildinni í viðbót við besta markvarðapar deildarinnar. Ég er ánægður með það þótt við klikkum á tíu opnum færum og tveimur vítaköstum. Það er ýmislegt jákvætt þrátt fyrir tap,“ sagði Sebastian sem hafði leitt Fram-liðið til sigurs í tveimur leikjum í röð í deildinni þegar hann mætti í Schenkerhöllina í gær.
„Það er mikill getumunur á Haukum og okkur. Við verðum að leika betur en þetta til þess að eiga möguleika á sigri. Mér finnst Haukar og Selfoss vera með tvö bestu lið deildarinnar. Önnur lið eru nokkuð á eftir þeim.
Ég er ánægður með hversu sárir mínir menn eru með að hafa tapað. Það er aldrei að gott að tapa en það er auðveldara að takast á við það ef maður hefur lagt sig fram. Við getum ekki kvartað yfir að menn hafi ekki reynt. Það sem verst er að við skyldum ekki leika betri vörn vegna þess að höfum verið góðir þar upp á síðkastið,“ sagði Sebastian Alexandersson, þjálfari Fram, í samtali við handbolta.is eftir leikinn á Ásvöllum.
