- Auglýsing -
- Færeyingurinn Elias Ellefsen á Skipagøtu og Japaninn Naoki Fujisaka skoruðu flest mörk á heimsmeistaramóti 21 árs landsliða karla sem lauk í Berlín á sunnudaginn. Þeir skoruðu 55 mörk hvor. Fujisaka lék tveimur leikjum færra en Elias og er þar með skráður markakóngur. Milos Kos, Serbíu, varð þriðji með 50 mörk.
- Elias varð stoðsendingakóngur HM með 48 sendingar. Joao Gomez frá Portúgal var næstur með 35. Efstur Íslendinganna var Andri Már Rúnarsson með 28 sendingar.
- Andri Már varð markahæstur íslensku piltanna. Hann skoraði 34 mörk og varð í 33. sæti. Næstir á eftir Andra Má komu Símon Michael Guðjónsson og Þorsteinn Leó Gunnarsson með 30 mörk hvor.
- Ísland varð í sjötta sæti yfir prúðustu lið mótsins þegar tekin eru saman brottrekstrar, rauð- og gul spjöld. Argentínska landsliðið var það prúðasta á mótinu samkvæmt þessari tölfræði og Slóvenar höfnuðu í öðru sæti.
- Brynjar Vignir Sigurjónsson varð efstur íslensku markvarðanna á HM með 32,5% hlutfalls markvörslu. Hann var í 18. sæti. Jón Þórarinn Þorsteinsson varði 31,6% skota sem á mark hans kom er í 21. sæti. Þriðji markvörðurinn, Adam Thorstensen, var með 24,4% markvörslu á mótinu.
- Íslenska landsliðið skoraði 28,8 mörk að jafnaði í leik á HM og fékk á sig 25,75 mörk að meðaltali í leik. Ísland varð í 20. sæti af 32 liðum yfir flest mörk en í sjötta sæti á listanum yfir að hafa fengið á sig fæst mörk. Heimsmeistarar Þýskalands skoruðu 34,5 mörk í leik og fengu á sig 25,5 mörk að jafnaði í leik.
- Auglýsing -
