- Ian Marko Fog hefur verið ráðinn þjálfari dönsku meistaranna GOG eftir nokkra leit forráðamanna félagsins að eftirmanni Nicolej Krickau sem tók við þjálfun Flensburg um síðustu mánaðarmót. Marko Fog er fimmtugur og fyrrverandi landsliðsmaður Dana sem lék á tíma m.a. með félagsliðum á Spáni og í Þýskalandi auk heimalandsins.
- Marko Fog þjálfaði Nordsjælland Håndbold frá 2013 til 2019 en hefur síðustu árin verið starfsmaður TMS Ringsted. Samningur GOG og Marko Fog er til þriggja ára. GOG hefur unnið danska meistaratitilinn undanfarin tvö tímabil.
- Snorri Steinn Guðjónsson landsliðsþjálfari karla var um skeið sterklega orðaður við þjálfarastarfið hjá GOG áður en formlega var gengið frá ráðningu hans til HSÍ. Aðeins eru tíu dagar þangað til æfingar hefjast hjá GOG fyrir næsta keppnistímabil.
- Í dag eru rétt átta ár síðan franska meistaraliðið PSG keypti Nikola Karabatic frá Barcelona fyrir tvær milljónir evra. Enn í dag er það metupphæð í kaupum á handknattleiksmanni.
- Franska meistaraliðið PSG sækir Gummersbach heim í æfingaleik 19. ágúst. Guðjón Valur Sigurðsson þjálfari Gummersbach lék með PSG tímabilið 2019/2020.