Hornamaðurinn Jakob Ingi Stefánsson hefur skrifað undir nýjan þriggja ára samning við handknattleiksdeild Gróttu. Jakob Ingi kom til Gróttu frá Aftureldingu árið 2019 og hefur leikið 84 leiki í Gróttubúningnum.
Jakob skoraði 76 mörk fyrir Gróttu á seinasta tímabili og hefur hans hlutverk stækkað hratt seinustu misseri. Hann er öskurfljótur og góður skotmaður sem vonandi heldur áfram að vaxa og dafna á Nesinu næstu árin. Víst er að hlutverk Jakobs Inga hjá Gróttu minnkar ekki við brotthvarf Andra Þórs Helgasonar sem gekk til liðs við Aftureldingu fyrr í sumar.
„Við erum í skýjunum með að Jakob verði áfram í Gróttu næstu árin. Hann hefur sýnt með góðri frammistöðu á seinasta tímabili hvers megnugur hann er. Við hlökkum mikið til áframhaldandi samstarfs með honum,“ sagði Róbert Gunnarsson þjálfari Gróttuliðsins þegar samningar voru í húsi.
