Á Facbook-síðu þýsku deildarkeppninnar er greinargóð færsla í dag þar sem Alfreð Gíslasyni, landsliðsþjálfara Þjóðverja í handknattleik karla, er óskað innilega til hamingju með 60 ára afmælið. Ljómandi góð mynd fylgir með af afmælisdrengnum auk myndbands sem vandað hefur verið mjög til vinnu á enda Alfreð í miklum metum í Þýskalandi eftir magnaðan feril, fyrst sem leikmaður og síðar sem einn sigursælasti handknattleiksþjálfari landsins.
Einhverjum hefur þó orðið illilega á í messunni vegna þess að Alfreð er bara alls ekki sextugur í dag.
Vissulega á Alfreð afmæli í dag en það er hinsvegar heilt ár liðið síðan hann varð sextugur. Ljóst er að einhverjum hefur orðið á í messunni eða skriplað á skötu við skoðun á afmælisdagabókinni. Kannski hefur bara einhver vaknað upp við vondan draum og hugsað sem svo að betra sé ári of seint en aldrei.
Handbolti.is sendir Alfreð innilegar hamingjuóskir með 61 árs afmælið og óskar honum áframhaldandi velfarnaðar utan vallar sem innan.
