„Munurinn núna og þegar við vorum síðast í Olísdeildinni er að mínu mati sá að við erum nær öðrum liðum í deildinni. Síðast var rosalega mikill munur. Ég tel hann vera minni núna,“ sagði Jón Gunnlaugur Viggósson þjálfari nýliða Víkings í samtali við Arnar Daða Arnarsson einn umsjónarmanna hlaðvarpsþáttarins Handkastið.
Þáttinn er m.a. hægt að nálgast hér en í honum er rætt um sex af 12 liðum Olísdeild karla en keppni í deildinni hefst á fimmtudagskvöld.
„Ég ætla að vera jákvæður en geri mér um leið grein fyrir að verkefni okkar verður mjög krefjandi. Ég vil frekar standa fyrir það sem þjálfari að gefa leikmönnum tækifæri og þroska þá til hins betra í stað þess að kaupa rándýra leikmenn og ná kannski fleiri stigum en skilja félagið eftir skuldum vafið og láta mig kannski hverfa á braut eftir það sem æðislegur þjálfari,“ sagði Jón Gunnlaugur ennfremur en hann stýrir Víkingi í Olísdeildinni í annað sinn á síðustu þremur árum.
Viðtal Arnars Daða við Jón Gunnlaug hefst eftir ca 54,30 mínútur. Í framhaldi af því skeggræða Arnar Daði, Theodór Ingi Pálmason og Styrmir Sigurðsson um Víkingsliðið, möguleika þess í deildinni og leikmannamál auk annars.
