Jón Bjarni Ólafsson línu- og varnarmaður FH í handknattleik karla hefur hannað og sett upp síðuna leikjaplan.is. Þar er á einfaldan hátt hægt að sjá hvaða leikir standa fyrir dyrum í Olísdeildum karla og kvenna og Grill 66-deildum karla og kvenna. Allt á einum stað.
Auk þess að fletta á milli deildanna fjögurra er hægt að velja lið, velli, umferðir. Fleiri kostir eru í boði.
„Ég bjó síðuna til til þess að einfalda mér að skoða leikina sem eru framundan og deildina yfirhöfuð. Það er hægt að sía leiki eftir nokkrum breytum og afrita hlekkinn með síunum til að senda á aðra með völdum síum,“ sagði Jón Bjarni við handbolta.is.
Jón Bjarni vonast til þess að leikjaplan.is létti fleirum en honum lífið nú þegar handboltinn er að fara á fulla ferð. Víst er að handbolti.is verður tíður gestur á síðunni á næstunni.
