Sjúkralistinn er langur hjá handknattleiksliði Selfoss um þessar mundir. Nýjasta nafnið á listanum er línumaðurinn ungi, Elvar Elí Hallgrímsson. Þórir Ólafsson þjálfari Selfoss, staðfesti við handbolta.is í gær að Elvar Elí hafi slitið krossband á dögunum. Til viðbótar er hornamaðurinn Guðjón Baldur Ómarsson að jafna sig eftir aðgerð í sumar. Hann sleit krossband í leik við FH í úrslitakeppninni í vor.
Einar Sverrisson og Sveinn Andri Sveinsson léku heldur ekki með Selfossi gegn Aftureldingu að Varmá í gærkvöld í viðureign liðanna í 2. umferð Olísdeildar.
Einar er sennilega með tognaða kviðvöðva. Einar sagði við handbolta.is í gærkvöld að hafi fundið fyrir þessum meiðslum fyrir leikinn við KA í fyrstu umferð en ákveðið að láta slag standa og taka þátt í leiknum. Því miður hafi þátttakan í leiknum gert illa verra. Einar sagði óvíst hversu lengi hann verði frá en vonast til að fjarverutíminn verði sem skemmstur.
Sveinn Andri tognað á nára í leiknum við KA í Sethöllinni á laugardaginn. Það var fyrsti leikur hans fyrir liðið. Sveinn kom til Selfoss skömmu fyrir upphaf Olísdeildarinnar.
Ragnar og Sverrir
Fyrir utan þá fjóra sem taldir hafa verið upp eru a.m.k. Ragnar Jóhannsson og Sverrir Pálsson úr leik vegna meiðsla. Þá eru ótaldir a.m.k. fimm leikmenn sem eru hættir eða farnir annað frá síðasta tímabili; Atli Ævar Ingólfsson, Guðmundur Hólmar Helgason, Ísak Gústafsson, Karolis Stropus og Sölvi Svavarsson.
Selfoss er án stiga eftir tvo fyrstu leiki sína í deildinni. Næsta viðureign Selfyssinga verður á heimavelli við Val á föstudaginn eftir viku.
Leikjadagskrá og staða Olísdeilda.
Afturelding vann stórsigur á ungmennaliði Selfoss
