„Ef það væri kennt vanmat í skólum þá ætti að leika þessar 60 mínútur sem kennsluefni. Leyfið krökkum að sjá hvernig á ekki að mæta til leiks,“ sagði Styrmir Sigurðsson einn umsjónarmanna Handkastsins um frammistöðu ÍBV gegn Víkingi í annarri umferð Olísdeildar karla í handknattleik. Víkingur vann öruggan sigur, 31:26, þvert á allar spár.
„Þetta var ekkert eðlilega léleg frammistaða,“ sagði Teddi Ponsa um framgöngu ÍBV-liðsins í leiknum.
Upp úr þessu spratt mjög lífleg umræða í þættinum um ÍBV-liðið og einnig Víkinga sem sendu umsjónarmönnum „freyðitöflu“ í viðtali eftir leikinn.
Umræðan um ÍBV hefst eftir ca 32,45 mínútur og stóð yfir í góða stund enda margar hliðar sem þurfti að skoða eftir þessi óvæntu úrslit í Safamýri á föstudagskvöld. Óhætt er að segja að stóryrði hafi síst verið spöruð fremur en fyrri daginn í Handkastinu.
