„Við höfum verið spurðir hvort um vanmat hafi verið að ræða af okkar hálfu. Mér finnst sú umræða ekki sanngjörn gagnvart Víkingum sem voru einfaldlega sterkari en við á öllum sviðum,“ segir Magnús Stefánsson þjálfari karlaliðs ÍBV í samtali við nýjasta þátt Handkastsins en hringt var til Magnúsar í þættinum og garnirnar raktar úr honum eftir óvænt tap Íslandsmeistaranna í heimsókn þeirra til Víkinga í Safamýri í síðustu umferð Olísdeildar karla.
Biðum allan leikinn
Magnús segir að e.t.v. hafi menn beðið og vonað allan leikinn að hlutirnir færu að smella hjá liðinu. Það gerðist bara ekki.
Segja má að Víkingar hafi fellt Eyjamenn á eigin bragði. Víkingur léku framliggjandi 5/1 vörnina sem ÍBV hefur verið þekkt fyrir að leika í meira en áratug. „Ekkert í varnarleik Víkings átti að koma okkur á óvart. Við höfum æft þessa vörn í 13 ár,“ sagði Magnús í Handkastinu.
Þetta og margt annað ræddu Magnús og sérfræðingar Handkastsins, Arnar Daði. M.a. var komið inn á portúgalska leikmanninn Daniel Esteves Vieira sem þykir hafa farið hægt af stað.
Viðtalið við Magnús hefst eftir 20,40 mínútur í nýjasta þætti Handkastsins.
