Handknattleikslið ÍH hefur boðað þátttöku sína í 2. deild karla á komandi leiktíð. Í tilefni þess hefur félagið rakað að sér leikmönnum síðustu daga enda ekki seinna vænna því fyrsti leikur liðsins verður gegn Stjörnunni U á sunnudaginn í Mýrinni í Garðabæ.
Nokkrir þekktir leikmenn hafa skráð sig til leiks með ÍH eftir því sem fram kemur á félagaskiptasíðu HSÍ. Meðal þeirra eru Arnar Freyr Ársælsson, sem síðast lék með Stjörnunni, og Jóhann Birgir Ingvarsson sem lengst af hefur verið leikmaður FH.
Einnig hefur Gísli Jörgen Gíslason boðað þátttöku með ÍH-liðinu og Veigar Snær Sigurðsson.
Benedikt Elvar Skarphéðinsson, sem lék lengi með FH en hefur minna farið fyrir allra síðustu ár, ætlar einnig að taka fram skóna og leika með ÍH-liðinu.
Tugir leikmanna til tveggja liða
Ekki færri en 14 handknattleiksmenn hafa fengið félagaskipti yfir til ÍH á síðustu dögum. Óhætt er að segja að þegar félagaskiptasíða HSÍ er skoðuð að öll vötn falli annað hvort til liðs ÍH eða Hvíta riddarans um þessar mundir. Ekki færri en þrír tugir handknattleiksmanna hafa fengið staðfest félagaskipti til liðanna sem ætla greinilega að leggja allt í sölurnar í 2. deild í vetur.
2.deild karla – leikjadagskrá.
