FH-ingurinn Ásbjörn Friðriksson lék aðeins með samherjum sínum í skamman tíma í upphafi leiksins við Val í Olísdeildinni í fyrrakvöld. Svipað var upp á teningnum í leik FH í vikunni á undan gegn ÍBV. Þá varð Ásbjörn að fara af leikvelli í fyrri hálfleik og kom ekkert meira við sögu.
„Ég tognaði aftan í læri í leiknum á móti ÍBV og það tók sig upp á móti Val,“ sagði Ásbjörn við handbolta.is í dag. „Ég vonaðist til að hafa verið búinn að jafna mig þegar kom að Valsleiknum en þurfti greinilega aðeins lengri tíma til að þola álagið sem fylgir leik,“ sagði Ásbjörn ennfremur en hann er kjölfesta FH-liðsins.
Ekki hægt að segja til um hvort Ásbjörn geti beitt sér af krafti þegar FH mætir Þór í Kaplakrika á föstudaginn í 13. umferð Olísdeildarinnar. Eftir leikinn á föstudaginn líða 12 dagar fram að næsta leik FH-inga.
