Sandra Erlingsdóttir lék einkar vel með TuS Metzingen þegar liðið tryggði sér sæti í átta liða úrslitum þýsku bikarkeppninnar í dag með fjögurra marka sigri á HSG Blomberg-Lippe, 28:24, í Blomberg. Staðan var jöfn þegar fyrri hálfleikur var að baki, 12:12.
Sandra skoraði sjö mörk úr 11 skotum, þar af voru þrjú markanna úr vítakasti, hvar hún var með fullkomna nýtingu. Síðast en ekki síst gaf Sandra sex stoðsendingar. Sandra var markahæst í Metzingenliðinu ásamt Juliu Behnke.
Aftur í undanúrslit?
TuS Metzingen er þar með einum leik frá því að leika eftir árangurinn á síðasta ári þegar liðið komst í undanúrslit og tók þátt í úrslitahelgi bikarkeppninnar sem þá fór fram í Stuttgart í byrjun apríl.
Þess má geta að danska handknattleikskonan Ida Margrethe Hoberg, sem lék með KA/Þór síðari hluta síðasta tímabils og gekk til liðs við Blomberg-Lippe í sumar, tókst ekki að skora að þessu sinni. Henni var einu sinni vikið af leikvelli.
