Gömlu samherjarnir úr íslenska landsliðinu í handknattleik, Aron Kristjánsson og Dagur Sigurðsson, verða andstæðingar í undanúrslitaleik handknattleikskeppni Asíuleikanna í Hangzhou í Kína á þriðjudaginn. Barein vann A-riðil átta liða úrslitanna en japanska landsliðið hafnaði í öðru sæti í B-riðli.
Landsliðs Bareina, undir stjórn Arons Kristjánssonar lagði Kúveit í úrslitaleik um efsta sæti A-riðils í morgun, 34:25. Bareinar voru mikið sterkari í leiknum og höfðu m.a. 10 marka forskot að loknum fyrri hálfleik, 21:11. Bareinar hafa unnið alla fimm leiki sína á mótinu til þessa.
Japanska landsliðið, sem Dagur Sigurðsson hefur þjálfað í sex ár, tapaði fyrir Asíumeisturum Katar, 32:29, eftir að hafa verið marki undir í hálfleik, 16:15. Katar vann þar með riðilinn með fullu húsi stiga. Japanska landsliðið vann tvo leiki í riðlinum í átta liða úrslitum áður en kom að tapinu í morgun.
Sem fyrr segir fara undanúrslitaleikirnir fram á þriðjudagsmorgun að íslenskum tíma. Tveimur sólarhringum síðar verður leikið um verðlaunasætin þrjú.
