Landslið Sádi Arabíu, undir stjórn Erlings Richardssonar, tapaði í morgun fyrir Suður Kóreu, 29:27, í annarri umferð A-riðils forkeppni Ólympíuleikanna sem stendur yfir í Doha í Katar.
Suður Kóreubúar voru einnig með tveggja marka forskot þegar fyrri hálfleikur var á enda, 16:14. Suður Kórea hefur þar með fjögur stig að loknum tveimur leikjum.
Leikið er í tveimur riðlum. Sex landslið eiga sæti í A-riðli. Auk Sádi Arabíu og Suður Kóreu eru það Katar, Sameinuðu arabísku furstadæmin, Kína og Indland. Erlingur og félagar unnu stórsigur á Indverjum í gær.
Í B-riðli eru landslið Barein, Íran, Kasakstan Kúveit og Japans.
Síðar í dag mætast m.a. landslið Barein og Japan í B-riðli keppninnar sem hófst í gær. Úrslit leiksins skera væntanlega úr um hvor hreppir efsta sætið.
Aron Kristjánsson er þjálfari Barein og Dagur Sigurðsson er að vanda með japanska landsliðið.
Að riðlakeppninni lokinni halda tvö efstu lið hvors riðils áfram og leika til undanúrslita og síðan til úrslita.
Tengt efni:
