Ragnheiður Tómasdóttir vinstri hornamaður FH og markahæsti leikmaður liðsins á síðasta tímabili leikur ekki með FH í Olísdeildinni sem hefst á föstudaginn. Þetta staðfesti Jakob Lárusson í samtali við handbolta.is í dag.
Ragnheiður er að fara til Slóvakíu í læknisnám. Jakob sagði það hafa legið fyrir um nokkurt skeið að Ragnheiður færi út en um tíma gerði hann sér vonir um að hún gæti tekið þátt í fyrsta leik FH í Olísdeildinni, gegn Stjörnunni á föstudagskvöld. Ljóst er að af því verður ekki.
Ragnheiður var markahæsti leikmaður FH í Grill 66-deildinni á síðasta keppnistímabili. Hún skoraði 107 mörk í 19 leikjum og var valin í landsliðshópinn sem stundaði æfingar í sumar.
Leikur Stjörnunnar og FH í Olísdeild kvenna hefst klukkan 17.45 á föstudag og fer fram í TM-höllinni í Garðabæ.
