Átta leikmenn ungmennaliðs ÍBV sýndu mikla seiglu og baráttuhug í dag þegar þeir fengu annað stigið úr leik sínum við ungmennalið Stjörnunnar í 2. deild karla þegar liðin leiddu saman hesta sína í Mýrinni í Garðabæ. Lokatölur voru 30:30. Ísak Logi Einarsson skoraði jöfnunarmark Stjörnunnar þegar 45 sekúndur voru til leiksloka.
Stjarnan var með fimm marka forskot að loknum fyrri hálfleik 19:14. Virtust leikmenn hafa öll tromp á hendi. Það reyndist ekki vera þegar á hólminn var komið í síðari hálfleik. Eyjamenn sóttu í sig veðrið og jöfnuðu metin, 22:22 og aftur 24:24. Síðar komust leikmenn ÍBV yfir, síðast 30:28. Stjörnunni tókst að jafna metin.
Eins og áður segir var ÍBV aðeins með átta leikmenn á skýrslu að þessu sinni. Roland Eradze stýrði liðinu af útsjónarsemi frá hliðarlínunni.
Stjarnan er með þrjú stig eftir þrjá leiki. ÍBV krækti í sitt fyrsta stig í leiknum eftir tap fyrir ungmennaliði Selfoss á dögunum.
Staðan og næstu leikir í 2. deild karla.
Mörk Stjörnunnar: Húgó Máni Ólafsson 8, Kristján Helgi Tómasson 5, Hrannar Máni Eyjólfsson 4, Stefán Orri Stefánsson 4, Pálmi Hrafn Gunnarsson 4, Ísak Logi Einarsson 3, Stefán Haukur Hreinsson 1, Rytis Kazakevicius 1.
Varin skot: Daði Bergmann Gunnarsson 12.
Mörk ÍBV: Hinrik Hugi Heiðarsson 12, Dániel Pintér 7, Breki Þór Óðinsson 4, Gauti Gunnarsson 4, Adam Smári Sigfússon 2, Andri Snær Andersen 1.
Varin skot: Jóhannes Esra Ingólfsson 12.
