Fjölnir, sem deilt hefur efsta sæti Grill 66-deildar karla með Þór undanfarnar vikur, tapaði í kvöld fyrir ungmennaliði Fram, 27:26, í upphafsleik 6. umferðar sem fram fór í Fjölnishöllinni.
Ungmennalið Fram komst með sigrinum í efsta sæti deildarinnar með 10 stig, einu stigi ofar en Fjölnir og Þór. Þórsarar eiga leik til góða gegn ÍR í Skógarseli á laugardaginn.
Famarar voru sterkari lengst af leiksins í kvöld. Þeir voru fimm mörkum yfir í hálfleik, 15:10. Fjölnismenn virtust vakna upp við vondan draum undir lok leiksins. Hljóp þeim þá kapp í kinn og skoruðu þrjú síðustu mörk leiksins. Mörkin nægðu ekki til þess að jafna metin. Þeir máttu sætta sig við fyrsta tapið í deildinni á leiktíðinni, og það á heimavelli.
Staðan og næstu leikir í Grill 66-deildum.
Mörk Fjölnis: Björgvin Páll Rúnarsson 8, Tómas Bragi Starrason 5, Viktor Berg Grétarsson 4, Bernhard Snær Petersen 3, Elvar Þór Ólafsson 2, Óðinn Freyr Heiðmarsson 2, Alex Máni Oddnýjarson 1, Dagur Logi Sigurðsson 1.
Varin skot: Bergur Bjartmarsson 4, Sigurjón Ágúst Sveinsson 4.
Mörk Fram: Marel Baldvinsson 8, Bjartur Már Guðmundsson 7, Eiður Rafn Valsson 7, Max Emil Stenlund 2, Sigurður Bjarki Jónsson 2, Arnþór Sævarsson 1.
Varin skot: Breki Hrafn Árnason 9.
