Ársþing Handknattleikssambands Íslands, HSÍ, hið 64. í röðinni, verður haldið mánudaginn 12. apríl 2021 í Laugardalshöll, samkvæmt tilkynningu á heimasíðu HSÍ.
Þar segir ennfremur: „Tilkynning um framboð til embættis formanns og stjórnar HSÍ skal berast skrifstofu HSÍ minnst 21 degi fyrir þing. Uppstillingarnefnd er þó heimilt að samþykkja framboð sem fram kemur síðar.
Málefni sem aðildarfélög eða sambandsaðilar óska eftir að tekin verði fyrir á þinginu skulu tilkynnt stjórn HSÍ minnst 21 degi fyrir þingið og skal stjórnin senda öllum aðildarfélögum og sambandsaðilum þau málefni eigi síðar en 7 dögum fyrir þingsetningu ásamt dagskrá þingsins.“
Handbolti.is sendi í gær fyrirspurn til formanns HSÍ, Guðmundar B. Ólafssonar, hvort hann gæfi kost á sér til endurkjörs. Svar hefur ekki borist. Tveggja ára kjörtímabili formanns rennur út á þinginu. Guðmundur hefur verið formaður HSÍ frá 2013. Eins rennur umboð einhverra stjórnarmanna út á sama tíma.
