Afturelding gefur ekkert eftir í keppninni um sæti í Olísdeild kvenna á næsta keppnistímabilið. Afturelding vann í dag ungmennalið HK, 33:26, í 13. umferð Grill 66-deildarinnar í Kórnum í Kópavogi og er þar með í þriðja sæti deildarinnar, næst á eftir ungmennaliðum Fram og Vals sem eru í efstu sætunum tveimur.
Aftureldingar liðið er með 18 stig eftir 13 leiki og er með fjögurra stiga forskot á Gróttu og ÍR sem eru helstu keppinautar Mosfellinga um efsta sæti deildarinnar af þeim liðum sem geta flust upp í Olísdeildina á næstu leiktíð. Ungmennaliðin eiga ekki þess kost að fara upp í Olísdeildina.
Ungmennalið HK var með yfirhöndina að loknum fyrri hálfleik, 16:14. Allt annað var upp á teningnum í síðari hálfleik þegar lið Aftureldingar tók völdin og vann með sjö marka mun þegar upp var staðið.
Mörk HK U.: Aníta Eik Jónsdóttir 7, Sara Katrín Gunnarsdóttir 6, Leandra Náttsól Salvarmoser 3, Lovísa Helenudóttir 3, Ólöf Ásta Arnþórsdóttir 2, Eva Hrund Harðardóttir 2, Amelía Laufey Milevic 1, Karen Hrund Logadóttir 1, Inga Dís Jóhannsdóttir 1.
Mörk Aftureldingar: Susan Ines Gamboa 6, Ragnhildur Hjartardóttir 6, Birna Lára Guðmundsdóttir 5, Telma Rut Frímannsdóttir 4, Anamaria Gugic 4, Drífa Garðarsdóttir 3, Þórhildur Vala Kjartansdóttir 2, Katrín Helga Davíðsdóttir 2, Andrea Ósk Þorkelsdóttir 1.
Staðan í Grill 66-deild kvenna.
