Aganefnd HSÍ hefur sektað handknattleiksdeild KA um 50 þúsund krónur vegna framkomu starfsmanns deildarinnar í garð dómara á leik KA og Aftureldingar sem fram fór í KA-heimilinu 9. nóvember. Í úrskurði aganefndar segir að umræddur starfsmaður hafi viðhaft gróft orðbragð gagnvart dómurum leiksins.
Handknattleiksdeild KA gafst kostur á að taka til varnar og skila inn greinargerð vegna málsins áður en aganefnd tók það fyrir. Í greinargerð handknattleiksdeildar er framkoma starfsmannsins viðurkennd og beðist afsökunar á henni.
„Með vísan til framangreinds telur aganefnd ljóst að umrætt atvik uppfylli öll skilyrði 18. gr. reglugerðar HSÍ um agamál og telur aganefnd að mál þetta varði sekt gagnvart handknattleiksdeild KA.
Telur aganefnd með hliðsjón af atvikum málsins að sú sekt sé hæfilega ákvörðuð að fjárhæð kr. 50.000,“ segir í fundargerði aganefndar HSÍ en fundargerðina er að finna hér fyrir neðan.
KA tapaði leiknum með fjögurra marka mun, 29:25.
Árni Bragi skoraði 12 mörk nyrðra – Aron og Jón Bjarni léku á oddi alsins
Myndskeið: Var tækifæri til þess að vinna
Myndskeið: Sterkt hjá okkur að fara heim með tvö stig
