„Afstaða HSÍ – Handknattleikssambands Íslands er semsagt sú að það má ekki misrita á leikskýrslu eitt nafn en það er fullkomlega heimilt að misrita alla leikmannasamninga og öll félagaskipti á kennitölu sem ekki er til í tæpt ár. Það eru minniháttar mistök sem má leiðrétta – en undir engum kringumstæðum má leiðrétta eitt nafn á leikskýrslu. Samræmið er ekkert,“ segir m.a. í yfirlýsingu Handknattleiksdeildar Harðar
Tilefni yfirlýsingarinnar er dómur dómstóls Handknattleikssambands Íslands sem birtur var í morgun vegna kæru Handknattleiksdeildar Harðar á niðurstöðu mótanefndar Handknattleikssambands Íslands um að Herði verði úrskurðað tap, 10:0, í viðureign sinn við Vængi Júpiters í Grill 66-deild karla í handknattleik 20. febrúar.
Það var mat mótanefndar og niðurstaða dómstólsins sem birtur var í morgun að Hörður hefði teflt fram ólöglegum leikmanni í fyrrgreindum leik. Hörður vann leikinn á leikvellinum, 35:29.
Handbolti.is greindi frá niðurstöðu dómsins þegar hann lá fyrir í morgun og mál lesa nánar hér.
Í yfirlýsingu Handknattleiksdeild Harðar segir að ekkert hafi verið tekið tillit til þess að kennitala Vængja Júpiters hafi verið óvirk um langt skeið og félagið geti þar af leiðandi ekki verið aðili að málinu.
„Mat dómsins er að ekki þurfi kennitölu til að vera aðili. Þetta eru nýjar upplýsingar og eitthvað sem hreyfingin hefur ekki hingað til ástundað. Því án kennitölu skilar enginn inn skattframtali, launamiðum, heldur úti bókhaldi, er með bankareikninga, borgar mótagjöld eða dómurum og tekur á móti styrkjum. Hvernig getur félagið Vængir Júpíters – Handbolti selt ársmiðana sína á kennitölu Fjölnis (Fjölnir) sl. haust en haldið því statt og stöðugt fram að það hafi verið mistök að fella niður kennitölu Vængjanna?
Hvernig má vera að hreyfingin sé ekki komin lengra en þetta?“ spyrja Harðarmenn.
Yfirlýsingu Handknattleiksdeildar Harðar er hægt að lesa í heild sinni hér fyrir neðan.
