Íslenska landsliðinu tókst ekki að komast í milliriðlakeppni heimsmeistaramótsins í handknattleik kvenna. Liðið var grátlega nærri því að vinna leikinn en því miður vantaði einhvern herslumun upp á. Jafntefli í síðasta leik riðlakeppninnar, 26:26, við Angóla nægði ekki.
Angóla flýtur áfram með Frakklandi og Slóveníu til Þrándheims í milliriðlakeppninnar. Angóla fór áfram á betri markatölu en liðið tapaði samanlagt með minni mun fyrir Frakklandi og Slóveníu en íslenska landsliðið.
Íslenska landsliðið fer til Danmerkur á morgun og mætir til leiks í keppninni um forsetabikarinn þar sem átta neðstu lið mótsins eigast við. Keppnin hefst á fimmtudaginn.
Angóla var marki yfir eftir jafnan fyrri hálfleik, 15:14 og náði fimm marka forskoti snemma í síðari hálfleik, 19:14. Íslenska landsliðið vann sig inn í leikinn og Sunna Jónsdóttir jafnaði metin, 21:21, þegar 14 mínútur voru til leiksloka. Eftir það var nánast jafnt á öllum tölum til leiksloka.
Herslumuninn vantaði upp á í jöfnum leik. Hvar þessi herslumunur lá er vandi að segja til um. Tvær rangar skiptingar geta haft sitt að segja þegar dæmið er gert upp.
Af leiknum verður væntanlega áfram dreginn lærdómur til framtíðar. Nú er ekkert annað í stöðunni en að fara til Danmerkur og vinna leikina sem eftir eru. Eins fúlt og það kann e.t.v. að hljóma.
Mörk Íslands: Sandra Erlingsdóttir 6/2, Þórey Rósa Stefánsdóttir 3, Thea Imani Sturludóttir 3, Perla Ruth Albertsdóttir 3, Elín Rósa Magnúsdóttir 3, Elísa Elíasdóttir 3, Díana Dögg Magnúsdóttir 2, Hildigunnur Einarsdóttir 1, Andrea Jacobsen 1, Sunna Jónsdóttir 1.
Varin skot: Elín Jóna Þorsteinsdóttir 10/2, 37% – Hafdís Renötudóttir 2, 18,7%.
Handbolti.is er í DNB-Arena og fylgdist með leiknum í textalýsingu hér fyrir neðan.
