„Það er frábært að ljúka þessu móti með sigri og bikar í hönd,” sagði Sunna Jónsdóttir fyrirliði íslenska landsliðsins í samtali við handbolta.is eftir sigurinn á Kongó, 30:28, í úrslitaleiknum um forsetabikarinn í handknattleik kvenna í Arena Nord í Frederikshavn í Danmörku í kvöld. Þar með lauk þátttöku Íslands á fyrsta heimsmeistaramótinu í 12 ár með 25. sæti af 32 liðum og bikar.
„Fyrsta stórmótið í 11 ár og við förum heim með bikar, forsetabikar reyndar, en bikar er alltaf bikar. Við bara lukum mótinu mjög vel með fjórum sigrum. Ég er bara mjög stolt af liðinu,” sagði fyrirliðinn.
„Við sýndum mikinn karakter í leiknum í kvöld í mjög krefjandi leik og reyndar má segja það um alla leikina í forsetabikarnum. Þeir reyndu allir mjög mikið á okkur allar sem vildum sýna að við ættum ekki heima í þessari keppni. En við fengum alvöru leiki og gerðum þetta vel,” sagði Sunna sem benti á að liðið hafi verið að ljúka 10 leikjum á 20 dögum.
„Þessi reynsla mun skila sér inn í vegferðina sem við erum á og mikið hefur verið rætt um,“ sagði Sunna Jónsdóttir fyrirliði sem sagði leikmenn a.mk. eldri leikmenn vera farna að horfa löngunaraugum til EM á næsta ári. „Annars erum við bara þakklátar fyrir að fá að vera með.“
