- Auglýsing -
Eyjamaðurinn og landsliðsmaðurinn Elliði Snær Viðarsson leikur ekki með Gummersbach í kvöld þegar liðið sækir Hüttenberg heim í þýsku 2.deildinni í handknattleik. Hann er meiddur á vinstri ökkla eða hæl og bætist þar með á nokkuð langan lista leikmanna liðsins sem eru á sjúkralista þessa dagana.
„Ég vonast til að vera ekki lengur en þrjár vikur frá keppni,“ sagði Elliði Snær í skilaboðum til handbolta.is í gærkvöld.
Þetta er fyrsti leikurinn sem Elliði Snær missir af með Gummersbach síðan hann kom til liðsins í lok ágúst.
Gummersbach er í þriðja sæti deildarinnar með 29 stig eftir 19 leiki og er tveimur stigum á eftir N-Lübbecke sem situr í öðru sæti. N-Lübbecke-liðið hefur leikið einum leik fleira.