Fjórir nýliðar í Skopje

Fjórir leikmenn íslenska kvennalandsliðsins tóku þátt í sínum fyrsta A-landsleik í gær þegar íslenska landsliðið mættir Norður-Makedóníu í fyrstu umferð forkeppni HM í A1 Arena SC Boris Trajkovski-íþróttahöllinni í Skopje.

Um er að ræða Katrínu Ósk Magnúsdóttur, markvörð Fram, Tinnu Sól Björgvinsdóttur, HK, Ásdísi Guðmundsdóttur, KA/Þór og Hörpu Valeyju Gylfadóttur frá ÍBV. Katrín Ósk og Ásdís höfðu áður tekið þátt í tveimur leikjum með B-landsliðinu.

Íslenska landsliðið leikur við Grikki í forkeppninni í kvöld. Leikurinn hefst klukkan 18 og verður í streymi á handbolta.is. Steymið verður kynnt nánar þegar nær dregur leiknum. Handbolti.is var einnig með streymi frá leik Norður-Makedóníu í gær sem hlaut góðar viðtökur.