Snorri Steinn Guðjónsson, landsliðsþjálfari karla í handknattleik, tilkynnir á morgun hvaða leikmenn verða kallaðir til æfinga og undirbúnings fyrir Evrópumótið sem hefst í Þýskalandi 10. janúar.
Reiknað er með að Snorri Steinn velji 20 leikmenn til æfinganna sem hefjast á öðrum degi jóla. Átján leikmenn verða í hópnum sem Snorri Steinn tekur með sér til Þýskalands.
Á leið sinni til Þýskalands millilendir íslenska landsliðið í Austurríki og mætir austurríska landsliðinu í tveimur vináttuleikjum í Vínarborg 6. janúar og tveimur dögum síðar í Linz.
Leikir Íslands í C-riðli EM í München:
12.janúar: Ísland – Serbía, kl.17.
14.janúar: Ísland – Svartfjallaland, kl. 17.
16.janúar: Ísland – Ungverjaland, kl. 19.30.
Blaðamannafundur Snorra Steins og HSÍ fer fram í höfuðstöðvum Arionbanka og hefst klukkan 11 á morgun.
Í tilkynningu frá HSÍ er því heitið að streymt verði frá fundinum á miðlum HSÍ.
