Forsvarsmenn Harðar á Ísafirði eru ekki af baki dottnir og hafa ákveðið að kæra niðurstöðu Dómstóls HSÍ í máli Harðar gegn mótanefnd Handknattleikssambands Íslands til Áfrýjunardómstóls Handknattleikssambands Íslands, HSÍ.
Dómstóll HSÍ kvað upp sinn dóm um miðjan þennan mánuð en í honum var tekið undir niðurstöðu mótanefndar að Herði væri dæmdur tapaður leikur gegn Vængjum Júpíters í Grill 66-deild karla sem fram fór 20. febrúar sl. vegna þess að leikmaður sem ekki var skráður á leikskýrslu kom við sögu í viðureigninni.
Bragi Rúnar Axelsson forsvarsmaður Harðar staðfesti við handbolta.is í gær að ákveðið hafi verið að fara með málið, sem nefndist kærumáli nr 2/2021, Handknattleiksdeild Knattsp. félagsins Harðar gegn mótanefnd Handknattleikssambandi Íslands fyrir Áfrýjunardómstól HSÍ.
Málið hefur verið nokkuð til umræðu í fjölmiðlum og síðast í gær sendi formaður Vængja Júpíters frá sér fréttatilkynningu vegna þess.
