Róbert Geir Gíslason, framkvæmdastjóri Handknattleikssambands Íslands, staðfesti við handbolta.is í morgun að HSÍ hafi sótt um undanþágur til heilbrigðisráðuneytisins vegna æfinga meistaraflokka og eins til æfinga kvennalandsliðsins sem þarf að hefja undirbúning sem fyrst vegna undankeppni HM sem fram fer í næsta mánuði.
Eins hafi HSÍ sent inn fyrirspurn vegna vinnustaðasóttkvíar vegna síðari viðureignar Íslands og Slóveníu í undankeppni heimsmeistaramóts kvenna sem til stendur að fari fram hér á landi 21. apríl.
Að sögn Róberts hefur HSÍ ekki fengið svör við fyrirspurnum sínum enda mun óskum hafa rignt inn til ráðuneytisins síðan hert var á sóttvörnum.
Mikilvægir leikir framundan
„Það er til heimild til að gera undanþágu til æfinga vegna alþjóðlegra verkefna landsliða. Kvennalandsliðið er svo sannarlega á leiðinni í eitt slíkt eftir miðjan apríl en þá standa tveir leikir fyrir dyrum við Slóvena þar sem farseðill á heimsmeistaramótið verður í boði fyrir sigurliðið,“ sagði Róbert sem hefur óskað eftir undanþágu fyrir kvennalandsliðið frá og með næsta mánudegi.
Verða að æfa
Leikmenn kvennalandsliðsins verða í sóttkví fram á morgundaginn að þeir fara í síðari landamæraskimun eftir komu til landsins frá Skopje á mánudaginn. Landsliðið tók þátt í forkeppni HM í Skopje um síðustu helgi með þeim glæsilega árangri að það ávann sér keppnisrétt í leikina tvo við Slóvena. „Við verðum að koma landsliðinu á æfingar sem allra fyrst eftir sóttkví. Ef félagslið þeirra mega ekki æfa þá verður HSÍ að gera allt sem hægt er til að halda landsliðsmönnum sínum við efnið fyrir leikina mikilvægu við Slóvena,“ sagði Róbert ennfremur.
Enginn úr íslenska hópnum sem kom frá Skopje greindist jákvæður við skimun á landamærum við heimkomu á mánudaginn.
Síðari leikurinn heima
Fyrri viðureign Íslands og Slóveníu fer fram 17. apríl. Ekki hefur verið neglt niður hvort leikið verður í Celje eða í Ljubljana. Síðari leikurinn fer að öllum líkindum fram í Schenkerhöllinni á Ásvöllum miðvikudaginn 21. apríl.
Vegna síðari leiksins hefur Róbert óskað eftir upplýsingum hvort enn sé í gildi svokölluð vinnustaðasóttkví sem bæði landslið gætu fallið undir við komuna hingað til lands eftir leikinn ytra og dvalið í fram yfir viðureignina hinn 21. apríl.
Hefur heppnast vel
HSÍ hefur nýtt hina svokölluðu vinnustaðasóttkví vegna fyrri verkefna í vetur, t.d. þegar Ísland og Litháen mættust hér á landi í nóvember, við komu landsliðs Portúgal hingað til lands í byrjun árs og eins í kringum undirbúning karlalandsliðsins fyrir heimsmeistaramótið í janúar. Hefur hún heppnast vel og engin smit greinst.
