„Það er erfitt að segja hvað kom fyrir svona skömmu eftir að leiknum er lokið. Kannski vorum við að gera þeim of auðvelt fyrir að mæta sóknarleik okkar. Sennilega erum við of fyrirsjáanlegir í sóknarleiknum. Við verðum að fara yfir það og laga fyrir næstu leiki,“ sagði Viggó Kristjánsson markahæsti leikmaður íslenska landsliðsins í samtali við handbolta.is eftir skellinn fyrir Ungverjum í lokaleik riðlakeppni Evrópumótsins í handknattleik karla í München í kvöld, 33:25.
„Við verðum að skoða okkar mál fyrir milliriðlanna því mér finnst við eiga talsvert inni á öllum vígstöðvum þegar litið er til allra þriggja leikjanna. Við höfum aldrei komist í gírinn á mótinu,“ sagði Viggó sem telur ungverska liðið vera það sterkasta sem íslenska liðið hefur mætt til þessa á mótinu.
„Á hreinni íslensku má segja að Ungverjar hafi rassskellt okkur í kvöld, flóknara er það ekki,“ sagði Viggó Kristjánsson landsliðsmaður í samtali við handbolta.is.
