Anton og Jónas eru á heimleið

Handknattleiksdómararnir Anton Gylfi Pálsson og Jónas Elíasson dæma ekki fleiri leiki á Evrópumótinu í handknattleik í Þýskalandi. Þeir eru á heimleið. Það staðfesti Anton Gylfi við handbolta.is í morgun.

Fækkað var í hópi dómara eftir að riðlakeppninni lauk í gærkvöld enda fer leikjum óðum fækkandi á mótinu.

Þeir dæmdu tvo leiki á mótinu. Annarsvegar viðureign Bosníu og Hollands í E-riðli í Mannheim 13. janúar og hinsvegar leik Tékklands og Grikklands í F-riðli München 15. janúar.

Þetta var þriðja Evrópumótið í röð í karlaflokki sem Anton og Jónas dæma saman en fjórða mótið sem Anton dæmdi. Hann dæmdi á EM karla 2012 með Hlyni Leifssyni. Auk þess dæmdu Anton og Hlynur saman á EM kvenna 2008.